Ինձ գումար է պետք. ավելին` որքան շատ, այնքան լավ

Աշխատավայրում գործընկերների բարձր աշխատավարձի մասին տեղեկանալը միշտ էլ շարժառիթ է դառնում սեփական աշխատավարձի  չափի վերաբերյալ պահանջ ներկայացնելու վերադասին։

Իսկ դրան հասնելու ճիշտ և սխալ մեթոդներ գոյություն ունեն։

Մեր օրերում,երբ վարկային համակարգը խորը ճգնաժամ է ապրում, ընկերություններն ամեն կարգի ջանքեր են գործադրում, որպեսզի կրճատեն իրենց ծախսերը: Այդ իսկ նկատառումներից ելնելով, աշխատավարձի հնարավոր բարձրացման հարցը քննարկելիս խորհուրդ ենք տալիս խուսափել հետևյալ վարքագծերից.

Ափերից դուրս գալ

«Մոտ մեկ տարի առաջ ստորադասներիցս մեկը մտավ իմ աշխատասենյակ, դուռն իր հետևից փակեց և բառիս բուն իմաստով պայթեց», պատմում է «SHL» ընկերության առևտրային տնօրեն Դեվիդ Վալենթայնը։ «Այնուհետև նա պահանջեց նվազագույնը 25%-ով բարձրացնել իր աշխատավարձը, քանի որ երեկույթներից մեկի ժամանակ գինովցած գործընկերները նրան ասել էին իրենց աշխատավարձի չափերի մասին»։ Այդ պահին Վալենթայնին հաջողվում է հանգստ ացնել «հունից դուրս եկած» աշխատակցին (ընդ որում, առանց աշխատավարձի բարձրացում խոստանալու), սակայն մի մոռացեք, որ ամեն վերադաս չէ, որ ըմբռնումով կմոտենա ձեր զայրույթի ու ընդվզումների տեղատարափին և, ավելին, կհանդուրժի նման պահվածք։

Հավասարություն պահանջել

Սա շատ բարդ հարց է։ Երբեմն, իսկապես, մարդիկ խտրականության զոհ են դառնում, օրինակ, սեռական պատկանելության պատճառով, սակայն, մասամբ, արհեստավարժ և բանիմաց աշխատակիցների աշխատավարձը սահմանվում է` հաշվի առնելով նրանց փորձն ու հմտությունները։

Նախորդ օրինակում «հունից դուրս եկած» աշխատակիցը հավասարություն էր պահանջում, սակայն Վալենթայնի պատասխանը կարճ էր և, անգամ, նվաստացուցիչ։ «Ես ակնարկեցի, որ մյուսների աշխատավարձի չափով չէ, որ պետք է որոշվի իր աշխատավարձի չափը և, որ իր աշխատավարձն այնքան է, որքան այն օգուտը, որն այդ աշխատակիցը բերում է ընկերությանը»,- պատմում է Դեվիդ Վալենթայնը։

Պահանջել` փոխարենը ոչինչ չտալով

Ոմանք ասում են. «Ես լավն եմ, որովհետև ինձ այդպես է թվում», պատմում է բրիտանական «Experteer» աշխատանքի տեղավորման գործակալության տնօրեն Տորստեն Մատը։ Նման մարդկանց Տորստեն Մատը պատասխանում է. «Ոչ, դուք այդպես եք կարծում, քանի որ իրապես չեք կարող ներկայացնել ձեր ձեռքբերումները»։ «Սակայն պետք չէ նաև մեկ այլ ծայրահեղության մեջ ընկնել», խորհուրդ է տալիս «Mabox» մարքետինգային ընկերության առևտրային տնօրեն Ջուլիա Գոսլինգը։ Ջուլիան պատմում է, որ աշխատավարձի բարձրացման նպատակով իր տնօրենի հետ հանդիպման ժամանակ նա այնքան է «ջուր ծեծել»՝ իր աշխատանքն ու հմտությունները գովաբանելով, որ տնօրենին ձանձրացրել է և արդյունքում ոչ մի բանի չի հասել։ «Քսան րոպե շարունակ ես խոսում էի ամեն ինչից և ոչնչից», - խոստովանում է տիկին Գոսլինգը։

Մի մտածեք, որ ձեր բիզնեսը կհարթի բոլոր խնդիրները

«Մի անգամ մասնավոր ներդրողների գիտաժողովում պոտենցիալ ներդրողներից մեկը հարցրեց սկսնակ գործարար մի տիկնոջ, թե վերջինս ինչի՞ վրա է պատրաստվում ծախսել այն 100 հազար ֆունտ ստեռլինգը, որը հայցում է իր ծրագրի իրականացման համար։ Կինն առանց երկար մտածելու պատասխանեց. «Առաջին երկու տարիներին ես մտադիր եմ տարեկան 50 հազար ֆունտ վաստակել»։ Այդ արտահայտությունը լսելուն պես բոլոր ներդրողներն իրենց բանկային գրքույկները հավաքեցին ու հեռացան», - պատմում է «Finance South East» գործակալության տնօրեն Սալլի Գուդսելը։ Գուցե և դա ձեր բիզնեսն է, սակայն, եթե նպատակ ունեք ներդրողների ներգրավել, ապա պատրաստ եղեք սկզբնական շրջանում զիջումների գնալ։

Խոսել հարբած վիճակում

«Մի անգամ ես հրավիրված էի կորպորատիվ երեկույթի։ Ավարտին ինձ մոտեցավ մի աշխատակից, ով որոշել էր, որ քաջության համար մի քանի բաժակ խմելն ու ոչ պաշտոնական մթնոլորտը գործը «գլուխ բերելու» հարցում կարող են օգնել», - հիշում է «JLT Benefit Solutions» ընկերության տնօրեն Դունկան Հոուորտը։ «Այդ աշխատակցին ես ակնարկեցի, որ պատեհ պահ չի ընտրել լուրջ խոսակցության համար և առաջարկեցի խոսել ավելի ուշ, սակայն նա այդ դեպքից հետո այլևս ինձ չմոտեցավ. չհանդգնեց»։ Այստեղից հետևություն. ռիսկի մի դիմեք և մի զայրացրեք ձեր ղեկավարին, քանի որ ամեն տեսակ լուրջ խոսակցությունները պետք է աշխատասենյակում տեղի ունենան։

Աշխատանքից ազատվելու սպառնալիք ներկայացնել

Այս տարբերակը երբեք չի գործի, եթե, իհարկե, դուք հանճար չեք և ձեր հեռանալը ճակատագրական հետևանքներ չի թողնի ընկերության ընդհանուր գործունեության վրա։ Փորձագետները հիշում են դեպքեր, երբ տնօրինությունը չի ենթարկվել հոգեկան շանտաժին և, արդյունքում, աշխատանքից ազատվելու դիմում գրած աշխատակիցները, մեղմ ասած, ծիծաղելի դրության մեջ են հայտնվել։ Նույնիսկ, եթե դուք մինչ այդ մի քանի գայթակղիչ առաջարկներ եք ստացել այլ ընկերությունն երից, խորհուրդ ենք տալիս ծանրութեթև անել ձեր քայլերը և շուտափույթ որոշումներ չկայացնել։ Մի անգամ պարոն Վալենթայնի ընկերության մի աշխատակից աշխատանքից հեռանալու դիմում ներկայացրեց այն բանից հետո, երբ ընկերությունը չհամաձայնեց երկու անգամ բարձրացնել նրա աշխատավարձը, մինչդեռ, մեկ այլ ընկերությունում նրան նման աշխատավարձ էին խոստացել։ Սակայն նոր առաջարկի հետ մանրամասն ծանոթանալիս և պայմանագրի դրույթները կարդալիս տվյալ աշխատակիցը նկատեց, որ պայմանագրով որևէ դրամական պարգևատրություն կամ կենսաթոշակ չէր նախատեսվում։ Ուստի, աշխատակիցը հասկացավ, որ ավելի լավ է դիմումը հետ վերցնի և մնա իր աշխատավայրում։

«Մարդ-արհմիություն» պահվածք

«Գործարարները երբեմն աշխատավարձի բարձրացման ակնարկները որպես անձնական վիրավորանք են ընդունում», - պարզաբանում է «JFL Search and Selections» կադրային գործակալության տնօրեն Ռոս Կինդերսլին։ Եթե ղեկավարին ասեք, որ նա պարտավոր է ձեր աշխատավարձը բարձրացնել, ապա նա անմիջապես հակագրոհի կանցնի։ «Ես ծանոթ եմ մի կնոջ, ով գնացել էր իր ղեկավարի աշխատասենյակ և ասել, որ մեկ այլ ընկերությունում միևնույն պաշտոնը զբաղեցնող իր ընկերուհու աշխատավարձը բարձրացրել են, ուստի, ինքն էլ նույնն է ակնկալում։ Բնականաբար, տնօրենը չի համաձայնել բարձրացնել տվյալ աշխատակցուհու աշխատավարձը, իսկ վերջինս զայրույթի պոռթկումով ասել է. «Դե որ այդպես է` ես դուրս եմ գալիս աշխատանքից» և սկսել արտասվել։ Պարոն Կինդերսլիի կարծիքով, ավելի լավ է աշխատավայրում դրական մթնոլորտ ստեղծել և խուսափել այնպիսի պահվածքից կամ արտահայտություններից, իբր` ղեկավարը ձեզ շահագործում է։ Ճիշտ կլինի արտահայտվել հետևյալ կերպ. «Ինձ դուր է գալիս իմ աշխատանքը և, կարծես թե, ես շատ բաների եմ հասել... Կուզենայի ձեզ հետ քննարկել հնարավոր առաջխաղացումների հարցը և պարզել, սպասվո՞ւմ են, արդյոք, աշխատավարձի վերանայումներ»։ Նման դեպքում դժվար թե ձեր ղեկավարը մերժի և չգնահատի ձեր աշխատանքը։

Ողորմություն խնդրել.

«Մի աշխատակցուհի եկավ իմ աշխատասենյակ և սկսեց պատմել, որ հազիվ է ծայրը ծայրինհասցնում, ամեն բան թանկացել է, փեսացուն կորցրել է աշխատանքը և, իրեն ավելի շատ գումար է հարկավոր», - պատմում է Կինդերսլին։ «Ես ասացի, որ ցավում եմ, սակայն ես չէ, որ պետք է պատասխանատվություն կրեմ իր փեսացուի համար»։ Գթասիրության փոխարեն Կինդերսլին այդ կնոջը խորհուրդ տվեց ավելի եռանդով աշխատել և ավելին վաստակել։ Կինն անմիջապես հասկացավ ակնարկը և սկսեց ավելի լավդրսևորել իրեն։ Արդյունքում, նա ավելի շատ սկսեց վաստակել։

Հարցեր, պատասխաններ, մեկնաբանություններ